یلغانسیز شهر
- شفیقه یارقین
- Jul 16
- 3 min read
یازووچی: شفیقه یارقین
روایت قیلیشلریچه اۉتگن زمانلرده، دنیانینگ بیر چېتیده، کیچیک؛ اما جوده کۉرکم بیر شهر بار اېکن. اوشبو شهر نینگ اولوسی آز؛ لېکن برچهسی بای اېکن. بو شهر ده هېچکیم ایشسیز یا دنگسه یا کسل اېمس اېکن. هر بیر کیشی بشقهلر بیلن بیر عایله نینگ اعضاسیدېک بیرگه یشر اېکن.
بو شهر نینگ یاش و قریسی، اېرکک - عیالی دایم ایشلب، اۉقیردیلر، حتی اولر نینگ پادشاه و ملکهسی هم بېکارلیک چاغلریده سرایده باغبانلیک و تیکووچیلیک قیلردیلر. برچه اېشیکلر و دوکانلر بو شهرده کېچه یو کوندوز آچیق اېدی؛ چونکه هېچکیم، هېچ بیر نرسهگه محتاج اېمسدی. بیرار نرسهگه محتاج بۉلسه، درّاو دولت خزانهسیدن اونگه بېریلردی، شونینگ اوچون، هېچکیم اۉغریلیک قیلمسدی.
بو شهرده هېچ قنداق گناهکار و مجرم بۉلمهگنلیگی اوچون قاضی و پولیسلر هم یخشی کتابلر یازیش همده بالهلرنی ارداقلش و تربیهلش بیلن مشغول اېدیلر. او یېرده نه قماقخانه بار اېدی و نه هم آتینی کیشی اېشیتگن اېدی. خدا هم بو اولوسنی سېوردی و اۉزی نینگ خیر و برکهسینی رحمت یاغمیریدېک اولرگه یاغدیرردی. شو باعث، دهقانلر بیر دانه بوغدایدن یوزته و بیر درختدن مینگته میوه حاصل آلردیلر. بو شهر، اولوسی نینگ راستکارلیگی طفیلی "یلغانسیز شهر" آتی بیلن دانگ ترهتگن اېدی.
یلغانسیز شهر یانیده باشقه بیر شهر بار اېدی. بو شهر نینگ پادشاه و ملکهسیدن سرای اهلی و اولوسیگچه برچهسی دنگسهلیک، بېکارلیک، یلغان، خیانت، گناه و جنایتگه عادت قیلگن اېدیلر. شونینگ اوچون، تېنگری تعالی اولردن ناراض اېدی و رحمت یاغمیرینی اولرگه یاغدیرمسدی. او شهر نینگ یېری و باغلری سووسیز، اۉتسیز و کمحاصل بۉلیب، اولوسی هم کمبغل و قشّاق اېدیلر.
اَیتیشلریچه، یالغان شهر نینگ پادشاهی، قۉشنیسی، یعنی یلغانسیز شهر نینگ آبادلیگی و آسایشدهلیگیدن خبردار اېدی و قیزغانردی. او، اۉز شهر و اولوسینی آباد و تینچ قیلالمسدی، شونینگ اوچون قۉشنیسی نینگ آبادلیگی و تینچلیگینی کۉرالمهی، یۉق قیلیش نیتیده اېدی. اونینگ اورینیشلری کۉپ ییللر ناکام بۉلدی؛ نېگه که یلغانسیز شهر نینگ اولوسی اۉز بیرلیگینی سقلب، هېچ قچان الدهنمهی، تۉغریلیک و ایشلشدن یوز اۉگیرمس اېدیلر.
نهایت، یلغان شهرنینگ پادشاهسی شیطان صفتلی بیر جادوگر یاردمیده یالغاندن بیر شکوهلی قصر قوردی. اونده تورلی گللر، قوشلر و چین حیاتده تاپیلمس غیرواقعی درختلرنی اۉرنهتیب، اېکیب قۉیدی. حالیگچه هېچکیم کۉرمهگن و یېمهگن یېمکلرنی تیارلهدی و یلغانسیز شهر پادشاهسی، ملکهسی و سرای بېکلری یو امیرلرینی مهمان قیلدی.
یلغانسیز شهر پادشاهسی، ملکهسی و بېکلری مهمانلیککه باردیلر. یلغان شهر نینگ پادشاهسی مهمانلرینی آو و سَیرگه آلیب باردی. اولرنی بیر هفته دوامیده بوتونلهی بېکار، خوش و عیش - عشرتده باقدی. بوندهی ایشلمهی، محنت قیلمهی، تینچ، مۉل- سۉل و شان – شوکتده یشش، یلغانسیز شهر نینگ پادشاهسی، ملکهسی و بېکلریگه خوش یاقدی. اولر بوتون حیاتلریده بونچهلیک شان – شوکت، بویوکلیک، بایلیک و بونچه تۉکین- ساچین یېمک - ایچمکلر و تورلی- تومن مېوه- چېوهلرنی کۉرمهگن و یېمهگن اېدیلر. شونینگ اوچون بیرینچی قتله یورهکلریده قیزغانیش تویغوسی اویغاندی.
یلغانسیز شهر پادشاهسی مېزبانیدن سۉرهدی:
- سیز ایشلهمهی توریب، شونچه بایلیک، شونچه آلتین- کوموشلرنی قندهی قیلیب تاپدینگیز؟
شوندهی فرصتنی کوتیب تورگن یلغان شهر پادشاهسی، بای بۉلیش نینگ قینغیر و ناتۉغری یۉللرینی اولرگه اۉرگته باشلهدی. او، آسایشدهلیک و تجملنی کۉپ مَقتب، ایشلشنی شونچه یمانلهدی که، یلغانسیز شهر پادشاهسی، ملکهسی همده بېکلری الدهنیب قالدیلر.
اولر، اۉز شهرلریگه قَیتگندن سۉنگ، ایشلشدن و محنت قیلیشدن قۉل تارتدیلر. «ایشلهمهگن، تیشلهمس» دېگنلریدېک، اولر سېکین- سېکین غیرقانونی، الدهش، ظلم، یلغان و خیانتگه باشلب، شو یۉللردن پول و دولت تۉپلشگه باشلهدیلر. یلغان شهر پادشاهسیدن اۉرگهنیب، اولوسگه آغیر سالیق قۉیدیلر و شو یۉل بیلن شاه و سرای عملدارلری نینگ تجمل و تۉکین- ساچین حیاتی تأمینلندی؛ کېچه یو کوندوز اولر نینگ اېشیکلری یاپیلیب، قلفلندی؛ نېگه که بېکارلیککه عادتلهنیب قالگن بیر عده، اۉغریلیککه قۉل چۉزدیلر؛ سودا-ساتیق رونقدن توشدی؛ چون که کۉپلب آدملر نینگ ساتیب آلیش اوچون پوللری یۉق اېدی. اولر نینگ صداقت، ایشچنلیک و محنتکشلیکلری طفیلی خیر و برکت ساچهیاتگن اولوغ تېنگری، اېندی بۉلسه، رحمت یاغمیرینی یاغدیرمهی قۉیدی. کۉپ اۉتمهی، برچه مېوهلی باغلر و یم – یشیل اۉرمانلر، چېچکتولر و اېکینزارلر قوریدی و تیکانتولرگه ٲیلندی. اېنگ یمانی شو اېدی که، پادشاه و اولوس اوشبو حال نینگ دلیلینی بیلمسدیلر.
اولر برچه عیبنی تقدیرگه باغلب، اونینگ تدبیر و چارهسینی اۉیلهمسدیلر....
بو اېرتکنی بیلیملی، تجربهلی بیر چال بابا اۉزی نینگ مهربان، ایشچن، درسلرینی اعلا بهالر بیلن اۉقییدیگن، تۉغریسۉز نېبرهسیگه اۉته قیغو و حسرت بیلن أیتیب بېردی. نېبره، چوقور اۉیگه چۉمدی و کۉپ تون و کونلر اۉیلهدی و اۉیلهدی...
نهایت، بیرینچیدن اۉزیدن باشلش و اۉرتاقلری و صنفداشلریگه ترغیب یۉلی بیلن اۉرگهتیشنی بیرینچی یۉل دیب بیلدی و هېچ قچان یلغان أیتمسلیک؛ هېچ قچان ایشدن قاچمسلیک؛ بوگون نینگ ایشینی اېرتهگه قۉیمسلیک؛ یخشی درس اۉقیش، بیلیم اۉرگهنیش و اېزگو عمللر بیلن باشقهلرگه اۉرنگ بۉلیشگه عزم قیلدی.
Comments